ب / راستە رۆژا قيامەتێ ئەڤ كارە دێ رويدەت، و ئەڤ چەندە ژى يا د سۆرەتا عەبەسەدا هاتى: ((فَإِذَا جَاءَتِ الصَّاخَّةُ))(( يَوْمَ يَفِرُّ الْمَرْءُ مِنْ أَخِيهِ))(( وَأُمِّهِ وَأَبِيهِ))(( وَصَاحِبَتِهِ وَبَنِيهِ))(( لِكُلِّ امْرِئٍ مِنْهُمْ يَوْمَئِذٍ شَأْنٌ يُغْنِيهِ)) ڤێجا ئەگەر رۆژا مرۆڤى ژ گوهان دكەت (كو رۆژا قيامەتێيە) هات. رۆژا مرۆڤ ژ برايێ خۆ درەڤيت و براتيا خۆ يا دەيبابى ژبير دكەت، و ژ ترساندا پشتا خۆ ددەتێ. رۆژا مرۆڤ ژ دەيبابێت خۆ درەڤيت، و كەس خۆ ل كەسێ نەكەتە خودان. رۆژا مرۆڤ ژ ژن و زارۆكێت خۆ درەڤيت ئەو ژن و عەيالێ د دنيايێدا هند حەژێ دكر، و سەرخاترا وان، سينگێ خۆ دئێخستە هەمى نەخۆشيان، ئەڤرۆ دێ ژێ رەڤيت. هەرەك وێ رۆژێ ب خۆڤە يێ مژويلە، و حالێ وى بەسى ويە.
پسيار ل ڤێرێ بۆچى ژ هەڤدوو درەڤن و يا پێشبين بەروڤاژيا ڤێ چەندێيە، زانا پتر ژ بۆچۆنەكێ ل سەر ڤێ بەرسڤێ هەنە:
ئێك: هەر د ئايەتێدا هاتيە دياركرن كا ژبەر چ ژ هەڤدوو درەڤن دويماهيا ئايەتێ دبێژيت:(( لِكُلِّ امْرِئٍ مِنْهُمْ يَوْمَئِذٍ شَأْنٌ يُغْنِيهِ))هەرئێك وێ رۆژێ ب خۆڤە يێ مژويلە، و حالێ وى بەسى ويە و خەما وى بەسى ويە و نەشێت خەما ئێكێ دى ژى هەلگريت، و دزانيت ئەڤێت ئەو ژێ درەڤيت دبيت هەر د وى كراسيدا بن و ئەو ژى خەما خۆ بۆ بێژن، ڤێجا دا خەما كەسێ نەهەلگريت، نەڤێت بكەڤيتە بەرامبەرى وان، چونكى هەرگاڤا كەفتە بەرامبەرى وان، خەما وى چەندا گرانە و يا نەخۆشە دێ ئەو خەمێت خۆ بێژن و هۆسا خەما وى دووقات و پتر دێ گرانتر لێ هێت، و د دنيايێدا ژى، هەكە ئێك يێ ب خەما خۆڤە يێ مژويل بيت و خەما وى يا گران بيت، نەڤێت ئێكى ببينيت وەكى وى خەما وى گرانتر لێ بكەت، هەكە ئێكێ هۆسا ديت دێ رێكا خۆ ژێ وەرگێريت و نەڤێت بكەڤيتە رێكا وى و دگەل وى كۆم ببيت، ڤێجا خەما رۆژا قيامەتێ گەلەكە و هەرئێك يێ ل خەما خۆ و نەڤێت خەما كەسەكێ دى هەلگريت، و هەرئێك يێ ل هيڤيێ كا دێ چ ب سەرێ وى هێت و ئەڤە ژى خۆشتڤيێت وينە و نەڤێت خەما وان ژى هەلگريت، ژبەر هندێ ژ وان درەڤيت.
بۆچۆنا دووێ: ژ هەڤدوو درەڤن، چونكێ ئەڤە بەرامبەرى ئێك د هەڤبەر پرسياربوون و كێماسى و سستى د راستا ئێك و دوودا ياكرى و هەرئێك ژ يێ دى دترسيت بێژيتێ تە ئەڤ تەخسيرى و كێماسى و سستيە د راستا مندا يا كرى و ژبەر ڤێ كێماسيێ ئەڤە هاتە سەرێ من، ڤێجا دا روى ب روى ڤێ پساركرنێ نەبن، ژ ئێك و دوو درەڤن، ڤێجا دا ئەڤە ب سەرێ مە نەهێت دڤێت ب ئەركێت خۆ د راستا ئێك و دوودا رابين و مافێت ئێك و دوو بدەينێ دا وێ رۆژێ د پشت راست بين و ژ بەرپرسياريێ نەترسين و ژ مرۆڤێت خۆ نەرەڤين.
بۆچۆنا سيێ: ئەڤ رەڤينە ژبەر هندێيە چونكى كراسێ وى هندى يێ نەخۆش و بەرتەنگە و نەڤێت كەس و كارێت وى بزانن كا ئەو د چ كراس و رەوشەكا بەرتەنگ و نەخۆشدايە ژ وان درەڤيت و نوزانيت ئەو ژى هەر يێت د وى كراسيدا و ئەو ئەگەرێ ئەو ژبەر ژ وان درەڤيت هەر ژبەر وى ئەگەرى ئەو ژى ژ وى درەڤن، چونكى ئەو دزانن وێ رۆژێ چو مرۆڤانى و مال و بنەمالى فايدێ مرۆڤى ناكەت، خودێ مەزن دبێژيت: ((يَوْمَ لَا يَنْفَعُ مَالٌ وَلَا بَنُونَ))(( إِلَّا مَنْ أَتَى اللَّهَ بِقَلْبٍ سَلِيمٍ)) رۆژا كور و كچ و چو تشتێ دى فايدەى نەگەهينيتە مرۆڤى، ژبلى كو مرۆڤ ب دلەكێ ساخلەم و دورست و ب باوەر بچيتە دەف خودێ. ڤێ دزانيت كەس مفاى ناگەهينيتە وى، ڤێجا دێ بێژيت: ما دێ بۆچى كراسێ خۆ بۆ بێژم و بۆچى بزانيت كا ئەز د چ كراس و رەوشەكا گران و بەرتەنگدا مە ڤێجا ئەز ژێ برەڤم باشترە، وێ رۆژێ خودێ مە بپارێزيت و مە نەئێخيتە د وى كراسێ گراندا، مە ژ وان بگێرينيت د وێ رۆژێدا يێت سەروچاڤ گەش و دەڤ ب كەنى و بەختەوەر و دلخۆش و مە ژ وان نەگێريت يێت سەروچاڤ شۆر و تۆزەوى و رەشاتيێ هلچني، و خودێ چێتر دزانيت.
