ب / ئەڤە ئايەتا (75 ـ 78) ژ سۆرەتا تەوبەيە، و راڤەكرنا وێ ئەڤەيە: و ژ وان دوورويان هەنە پەيمانێ دگەل خودێ ددەن، ئەگەر خودێ ژ كەرەما خۆ مالى بدەتە مە، ب راستى و ب سويند ئەم دێ خێر و سەدەقەيان دەين، و ئەم دێ بينە ژ مرۆڤێت قەنجيكار، ڤێجا وەختێ خودێ ژ كەرەما خۆ مال دايێ، وان دوورويان قەلسى و چرويكى كرن و چو خێر نەدان، وەكى سويند خوارين، و پشتا خۆ دانێ ـ دانە پەيمانا خۆ ـ و ئەو د روى وەرگێرانا خۆدا ركهشك، ڤێجا چرويكيێ دووروياتيەكا بەردەوام هێلا د دلێ واندا، هەتا رۆژا دگەهنە خودێ، ژبەر جهنەئينانا پەيمانا وان دايى، و ژبەر درەوێت وان دكرن. ئەرێ ما وان نەزانيە، خودێ نهينى و پستەپستا وان دزانيت، و ب راستى خودێ زێدە زانايێ نهينيانە.
هندە تەفسيرزانان ئەگەرێ هاتنەخوارا ڤێ ئايەتێ چيرۆكەك ئينايە ئەو ژى ب كورتى ئەڤەيە:
سەعلەبێ كورێ حاتبى هاتە دەف پێغەمبەرى (سلاڤێت خودێ لێ بن) و ژێ خواست بۆ دوعا بكەت خودێ مالى بدەتێ، پێغەمبەرى (سلاڤێت خودێ لێ بن) گۆتێ: ((كێمەك تو دەرهەق دەركەڤى چێترە ژ گەلەكێ تو خۆ ل بەرنەگرى))، جارەكا دى گۆت: ئەز ب وى كەمە يێ تو ب راستيێ هنارتى هەكە خودێ مال دا من ئەز دێ هەر ئێكى هەقێ وى دەمێ، ئينا دوعا بۆ كرن، پەز خودانكر و زێدەبوو هەروەكى كرم زێدە دبن هەتا جهێ وى ل مەدينێ نەكرى، دەركەفتە نهالەكێ، دەسپێكێ بەس دهاتە نڤێژا نيڤرۆ و ئێڤارى و پاشى هەمى هێلان بەس يا خوتبێ دهات، بەحسێ وى دگەهشتە پێغەمبەرى (سلاڤێت خودێ لێ بن) دگۆت: خۆلى ب سەرێ وى، پاشى پێغەمبەرى (سلاڤێت خودێ لێ بن) هنارت زەكاتا خۆ بدەت، گۆت: ئەڤە سەرەزێرە يان خويشكا سەرەزێريێيە و زەكاتا خۆ نەدا، ئاخفتنا وى گەهشتە پێغەمبەرى (سلاڤێت خودێ لێ بن) ئينا ئەڤە ئايەتە د راستا ويدا هاتە خوارى، پشتى زانى قورئانا د راستا ويدا هاتيە خوارێ هات و ڤيا زەكاتا خۆ بدەت، پێغەمبەرى (سلاڤێت خودێ لێ بن) هەتا چۆيە بەر دلۆڤانيا خودێ ژێ نەوەرگرت، و پشتى پێغەمبەرى (سلاڤێت خودێ لێ بن) هاتە دەف ئەبو بەكرى دا زەكاتا خۆ بدەت، گۆتێ: پێغەمبەرى (سلاڤێت خودێ لێ بن) ژ تە نەوەرگرتيە ئەز دێ ژ تە وەرگرم! ژێ نەوەرگرت هەتا چۆيە بەر دلۆڤانيا خودێ، و پشتى وى هاتە دەف عومەرێ كورێ خەتابى (خودێ ژێ رازی بیت) دا زەكاتا خۆ بدەت ژێ نەوەرگرت و گۆتێ: يێت ژ من چێتر ژ تە نەوەرگرتيە ئەز دێ ژ تە وەرگرم! و پشتى ئەو چۆيە بەر دلۆڤانيا خودێ هاتە دەف عوسمانێ كورێ عەفانى (خودێ ژێ رازی بیت) دا زەكاتا خۆ بدەت، ژێ نەوەرگرت و گۆتێ: يێت ژ من چێتر ژ تە نەوەرگرتيە ئەز دێ ژ تە وەرگرم، و سەردەمێ عوسمان (خودێ ژێ رازی بیت) مر و زەكاتا وى ژێ نەهاتە وەرگرتن.
ئەڤ چيرۆكە ژ لايێ رێك و ناڤەرۆكا خۆڤە يا لەوازە و نەيا دورستە، و لەوازيا د ناڤەرۆكێدا ئەڤا خوارێيە:
ئێك: ژ لايێ ناڤەرۆكێڤە خودێ مەزن تۆبێ قەبويل دكەت هندى نەكەڤيتە د سەكەراتێدا، و ئەڤ مرۆڤە چەند جارا يێ هاتى تۆبە بكەت يێ هاتيە پاشڤەبرن، و ئەڤە نەيا بەرئاقلە، ئەڤێت موسلمانبوونا وان گيرۆبووى هەتا ڤەكرنا مەكەهێ و خرابيێت مەزن كرين دەمێ هاتين تۆبە بكەن پێغەمبەرى (سلاڤێت خودێ لێ بن) ژ وان قەبويلكر و پاشڤە نەبرن، و يێ شێرێ ئيسلامێ سەردارێ شەهيدان كوشتى ئيمام حەمزە دەمێ هاتى موسلمان بووى خودێ ژێ قەبويل كر، و هندا زكێ ئيمام حەمزە دراندى و ڤياى مێلاكا وى بخۆت دەمێ تۆبەكرى ژێ هاتە قەبويلكرن، ڤێجا چاوا ژ ڤى ناهێتە قەبويلكرن و پتر ژ جارەكێ بێتە پاشڤەبرن، ئەڤە ناكەڤيتە عەقلى.
دوو: يا ئاشكرايە د ئيسلامێدا يێ زەكاتا خۆ نەدەت ب خورتى دێ ژێ هێتە ستاند هەكە ب دلێ خۆ نەدا، لەوا دەمێ پشتى پێغەمبەرى(سلاڤێت خودێ لێ بن) هندە عێلێت عەربان گۆتى ئەم زەكاتا خۆ نادەين ئەبو بەكرى (خودێ ژێ رازی بیت) گۆت: ئەز ب خودێ كەم ئەز دێ شەرێ وان ل سەر كەم.
و لەوازيا ڤێ چێرۆكێ ژ لايێ سەند و رێكێڤە ژ عەليێ كورێ يەزيدێ ئەلهانيە، و هەمى حەديسزان ئێك دەنگن ل سەر لەوازيا وى، و ئەو زانايێت ئەڤ چيرۆكە لەواز دانايى ئەڤەنە: ئبن حەزەم د (المحلى)دا و مەناوى د (فيض القدير)ێدا و حافزێ عيراقي د (تخريج احاديث الاحياء)ێدا و موحەمەد بن تاهر د (الاحاديث الموضوع)ـەدا و قورتبى د تەفسيرا خۆدا و ئيمامێ زەهەبى د (ميزان الاعتدال)دا و ئبن حەجەر د (تخريج احاديث الكشاف)دا و سيوتى د (اسباب النزول)دا و ئەلبانى د (سلسلە الاحايث الضعيف)دا و ئبن حەجەر د (الاصابە)دا دبێژيت: ئەڤ چێرۆكە نەيا دورستە، و پتر ژ تەفسيرزانەكى دبێژن: ئەڤ ئايەتە د راستا هندە دووروياندا يا هاتى، ژ وان: (نبتل بن الحارث و الجد بن قيس و معَّتب بن قشير)، و خودێ چێتر دزانيت.
