ب / هەر ناڤەكێ دورست بيت و چو رامانێت كرێت نەهەلگريت و خودانێ ناڤى شەرمێ ژێ نەكەت دەمێ مەزن دبيت يێ ئاخرەتيە، چونكى ئەز تێ دگەهم خەلكێ مە دەمێ دبێژيت ناڤێ ئاخرەتى مەخسەد و ئنيەتا وان ناڤێ دورست و شەرعيە، بەلێ كا كيژ ناڤ ژ هەميان خودێ پتر حەژێ دكەت د حەديسا سەحيحدا هاتى خۆشڤيترين ناڤ بۆ خودێ (عبد الله) و (عبد الرحمن)ن، و هندە تەفسيرزان ڤێ ئايەتێ دكەنە دەليل كو (عبد الله) خۆشڤيترين ناڤە ل دەف خودێ ب ڤى ناڤى گازى پێغەمبەرێ خۆ (سلاڤێت خودێ لێ بن) دكر ((وَأَنَّهُ لَمَّا قَامَ عَبْدُ اللَّهِ يَدْعُوهُ كَادُوا يَكُونُونَ عَلَيْهِ لِبَدًا )) مەخسەد پێ موحەمەدە پێغەمبەرێ خودێ (سلاڤێت خودێ لێ بن). و ئيمامێ مەناوى دبێژيت: باشترين ناڤ (محمد و احمد)ـە، چونكى خودێ ئەو يێ بۆ خۆشتڤي و پێغەمبەرآ خۆ هەلبژارتى، ئەو ناڤێ خودێ هەلبژارتى و بۆ يێ ژ هەميان خۆشڤيتر دڤێت ژ هەمى ناڤان باشتر بيت، و رێك و سونەتا پێغەمبەرى (سلاڤێت خودێ لێ بن) د ناڤاندا ئەڤەيە: ناڤ يێ كرێت نەبيت، هەكە يێ كرێتبا دگوهۆرى، وەكى: ناڤێ كچەكێ عاسيە بوو كرە جەميلە، و هەكە رامانا ناڤى گونەهبا ژى ديسا دگوهۆرى ناڤێ عەبدلعوززا كرە عەبدلرەحمان، و هەكە ناڤ بێهيڤياتى تێدابا دگوهۆرى، حەرب كرە سلم و سەعب كرە سەهل و هۆسا، و ناڤێ مەدحە و تەزكيە تێدابا دگوهۆرى وەكى: ناڤێ بەررە كرە جوەيريە و زەينەب و هەكە ناڤ نەيێ كرێتبا و گونەهـ تێدا نەبا و بێهيڤياتى و تەزكيە تێدا نەبا ناڤ وەكى خۆ دهێلا و نەدگوهۆرى، وەكى: ناڤێ ماريايێ هەرچەندە نەناڤەكێ عەرەبى بوو بەلێ دگەل هندێ ژى وەكى خۆ هێلا و نەگوهارت، و پێغەمبەرى (سلاڤێت خودێ لێ بن) حەژ ناڤێ (عبد الله) و (عبد الرحمن) دكر، ژبەر ڤآ هندە زانايێت مە دبێژن: موستەحەبە ئەم ڤان ناڤان راكەين و هەر ناڤەكێ ڤێ رامانێ بدەت، و هندە ناڤ د مەكروهن كوردى بن يان عەرەبى يان ب هەر زمانەكێ دى بن، ئەو ناڤێت بێ ئومێدى تێدا وەكى سەعب و دلبرين و دلژان و دلخوين شوينا وان فەرە ئەم بكەينە دلشاد، دلخۆش، دلدار و هۆسا. ديسا ئەو ناڤێت تەزكيە تێدا د مەكروهن نەحەرامن، وەكى: ديندار، موئمن، ئيمان و هۆسا، چونكى دبيت دێ بێژى ديندار ئێك ل دەف تە دێ بێژيت دندكا دينى نينە.. ديندارێ چ، ئێكسەر دێ بەزيتە رامانا ناڤى؛ نە ناڤێ دێ بێژى ئيمان يان موئمن، دێ بێژيت كا ئيمان دندكا ئيمانێ نينە و هۆسا. ديسا حەرامە ناڤێ عەبدينيا غەيرى خودێ پێڤەبيت وەكى (عبد النبي) و (عبد المناف) و (عبد الحسن). ديسا حەرامە مرۆڤ ناڤآ شاهينشاهـ ل خۆ بكەت ئانكو شاهێ شاهان، چونكى شاهێ شاهان خودێيە، و ل دەف ئيمام مالكى مەكروهە مرۆڤ ناڤێت ملياكەتان ل خۆ بكەت، وەكى: جبريل و ميكائيل، بەلێ ئەڤە بەس دەف مالكى هۆسايە، دەف زانايێت دى دورستە. يا گرنگ و فەر د ناڤيدا ئەو شەنگستێت مە گۆتين هەرگاڤا ئەو هەبيت ناڤ يێ ئاخرەتيە و شەرعيە كوردى بيت عەرەبى. يا ماى ئەز بێژم: مخابن هندەكێت خۆ ب وەلات پەروەريێ دئيننە دەرێ ل دەف وانان وەلات پەروەرى ب ناڤيە بەرهنگاريا هندە ناڤا دكەن، خەلكى ژ حەژێكرن، ئەو ناڤ يێ دانايە سەر عەيالێ خۆ، وەكى ناڤێت سەحابان و پێغەمبەران دا بۆ ببنە بەلگە و شاهد كو ئەو حەژ وان دكەن بەلكى رۆژا قيامەتێ خودێ حەشرا وان دگەل وان بكەت، ژبەر گۆتنا پێغەمبەرێ خۆشتڤى (سلاڤێت خودێ لێ بن): مرۆڤ رۆژا قيامەتێ يێ دگەل وى يێ حەژێ دكەت، و خۆزى ئنيەتێت وان د پاك و پاقژبانە، نوزام ئەو ديرۆكێ ناخوينن و نوزانن ئەو ناڤێت ئەم ئەڤرۆ سەرێ خۆ پێ بلندكەين د هەمى واراندا د وارێ بزاڤا رزگاريخوازا كورديدا يان د وارێ تۆر و ئەدباندا يان د وارێ عەگيدى و خۆشمێريێدا يان د وارێ زانين و زانستێدا ناڤێت وان هەمى عەرەبى بوون (شێخ عوبەيدوللا و شێخ سەعيد و قازى موحەممەد و شێخ عەبدولسەلام و مەلا موستەفا و ئەحمەدێ جزيرى و ئەحمەدێ خانى و مەلا حسێنێ باتەيى و... هتد)، ڤێجا بلا ئەڤ مرۆڤە بەلگێ تويێ ژ سەر خۆ راكەن وان ناڤەشێريت، و بلا بزانن، ناڤ مافەكێ كەسايەتيە، دڤێت كەس مايێ خۆ تێ نەكەت، و كەس ڤێ تێنەگەهيت ئەز هايدانا ناڤێ كوردى ناكەم.. نەخێر، وەسا نينە، بەس من دڤێت بێژم ناڤ مافەكێ كەساتيە چ ناڤێ بۆ خۆ هەلدبژێريت بلا هەلبژێريت بەس ئەڤ شەنگستێت بۆرى بەرچاڤ بێنە وەرگرتن د شەرعينە و دورستن، و خودێ چێتر دزانيت.
