ب / پێدڤيە مامۆستا تەقوا خودێ د ئەركێ خۆدا بكەت، و ب دورستى ب ڤى ئەركى رابيت و بزانيت ئەڤ قوتابيە ئەمانەتن د ستۆيێ ويدا، و رۆژا قيامەتێ دێ پسيارا وان ژ وى هێتەكرن، كا وى چ كار د وى ئەمانەتيدا كر.. پاراستن يان بەرزەكرن، چونكى پێغەمبەرێ خۆشتڤى (سلاڤێت خودێ لێ بن) دبێژيت: (كُلُّكُمْ راعٍ، وكُلُّكُمْ مسئولٌ عنْ رعِيتِهِ) ئانكو: هوين هەمى چاڤدێر و پارێزەرن، و هوين هەمى بەرپرسن ژ يێت ژێر چاڤدێريا خۆ، ڤێجا دڤێت مامۆستا د ئاستێ ڤێ بەرپرساتى و ئەمانەتيدا بيت، هەكە وى شيانێت پێدڤى نەبن دڤێت كاربكەت خۆ بگەهينيتە وى ئاستى و شيانا ل دەف خۆ پەيداكەت، هەكە وەنەكەت و سستيێ د ئەرك و واجبيدا بكەت يێ گونەهكارە و دبيت نەگونەهكا بچويك بيت كا چەند قوتابى ل بەر دەستآ وينە و وانەيان ددەتە چەندان گونەها هندان د ستۆيێ ويدايە، دگەل گونەها وێ نەزيرەكى و نەتێگەهشتنا ل دەف ڤان پاشەرۆژێ پەيدا دبيت, ژ ئەگەرێ ڤى سەيدايێ لاواز، و هەكە وى ئەڤ ئەمانەتە نەپاراست و حەقێ وێ نەدايێ ئەڤە ئەمانەت بۆ وى هاتە ئێخستن، يێ نەهەژى، هنگى بلا ئەم ل هيڤيا قيامەتێ بين، چونكى ئێك هاتە دەف پێغەمبەرى (سلاڤێت خودێ لێ بن) هەروەكى د بوخاريێدا هاتى گۆتێ: كەنگى قيامەتە؟ (سلاڤێت خودێ لێ بن) گۆت: هەكە ئەمانەت هاتە بەرزەكرن ل هيڤيا قيامەتێبە. گۆت: و بەرزەكرنا وێ چاوايە؟ (سلاڤێت خودێ لێ بن) گۆت: هەكە كار ئێخستە دەستێ يێ نەهەژى ل هيڤيا قيامەتێبە. بەلێ هەكە مامۆستاى شيان هەبن و چو ل دەف خۆ نەهێلايە و سستى و بێخەمى د كارێ خۆدا نەكريە و فەرق و جوداهى ژي نەكريە و هندەك تێگەهشتن و هندەك نە.. هنگى مامۆستاى گونەها خۆ نينە، چونكى مرۆڤ هند يێ بەرپسيارە هندى مرۆڤى شيان هەبن. خودێ مەزن دبێژيت: ((لَا يُكَلِّفُ اللَّهُ نَفْسًا إِلَّا وُسْعَهَا ) خودێ هەركەسەكى ژ بارێ وى زێدەتر لێ ناكەت، و خودێ چێتر دزانيت.
