ب/ گه‌له‌ك زانا دبێژن: هه‌كه ڤێ بۆ خۆ بكه‌ته عه‌ده‌ت و ڤێ سۆره‌تێ ب تنێ بخوينيت مه‌كروهه، و نه د جهێ خۆدايه، به‌لێ نڤێژ يا دورسته و دوباره ناكه‌ته‌ڤه، ئه‌ڤه هه‌كه هنده سۆره‌تێت دى ژى بزانيت، به‌لێ هه‌كه ژ ڤێ سۆره‌تێ پێڤه‌تر نه‌زانيت دورسته و چو تێدا نينه؛ چونكى نه‌دورسته مرۆڤ سۆره‌ته‌كێ ب تنێ ب نڤێژێڤه گرێده‌ت و قورئانێ هه‌ميێ بده‌ته لايه‌كى، به‌لێ هه‌كه هنده جاران بيت يان بارا پتر بيت ـ به‌لێ نه‌هه‌مى جاران ـ دورسته و چو تێدا نينه، هه‌روه‌كى د ڤه‌گێرا بوخاريدا هاتى: زه‌لامه‌ك ژ ئه‌نساران به‌رنڤێژى ل مزگه‌فتا قوبايێ بۆ موسلمانا دكر، هه‌ر سۆره‌تا خواندبا به‌رى وێ سۆره‌تا (إخلاص) دخواند، گۆتنێ بۆچى هه‌ر سۆره‌تا تو دخوينى تو به‌رى وێ سۆره‌تا (إخلاص) دخوينى؟! گۆت: هۆسايه هه‌وه بڤێت ئه‌ز هۆسا دێ ئيمامه‌تيا هه‌وه كه‌م و هه‌كه هوين د پێ نه‌خۆشن ئه‌ز ئيمامه‌تيا هه‌وه ناكه‌م، نه‌چار بوون هه‌ر ئه‌و ئيمام بمينيت ، و سوحبه‌تا وى گه‌هشته پێغه‌مبه‌رى (سلاڤێت خودێ لێ بن) ((گۆتێ بۆچى هه‌ر سۆره‌تا تو بخوينى تو (إخلاص)ێ به‌رى وێ دخوينى؟))، گۆت: ئه‌ى پێغه‌مبه‌رێ خودێ.. چونكى ئه‌ز حه‌ژ سۆره‌تا (إخلاص) دكه‌م، ئينا پێغه‌مبه‌رى (سلاڤێت خودێ لێ بن) گۆتێ: ((حه‌ژێكرنا ته بۆ ڤێ سۆره‌تێ دێ ته به‌ته به‌حه‌شتێ)) و خودێ چێتر دزانيت.
