ب/ ب راستى د ڤێ له‌ز و به‌زێدا ئه‌م نه‌شێين حه‌قێ نڤێژا شه‌ڤێ بده‌ينێ و دياركه‌ين كا چه‌ند قه‌ر و بها هه‌يه و چه‌ند ئايه‌ت و حه‌ديس ل سه‌ر خێر و قه‌در و بهايێ شه‌ڤنڤێژان هاتينه، به‌لێ ب كورتى ئه‌م دێ ئيشاره‌تێ ده‌ينه هنده‌كێت كێم ب تنێ، و ب راستى گه‌له‌ك ئايه‌ت ل سه‌ر قه‌در و خێرا رابوونا شه‌ڤێ و شه‌ڤنڤێژان يێت هاتين، ژ وان: خودايێ مه‌زن ناڤێ وان كريه (محسنين) ئانكو: قه‌نجيكار و كاربنه‌جه، و ئه‌ون هه‌ژى دلۆڤانيا خودێ، خودايێ مه‌زن دبێژيت ((إِنَّ الْمُتَّقِينَ فِي جَنَّاتٍ وَعُيُونٍ ))((آخِذِينَ مَا آتَاهُمْ رَبُّهُمْ إِنَّهُمْ كَانُوا قَبْلَ ذَٰلِكَ مُحْسِنِينَ))((كَانُوا قَلِيلًا مِّنَ اللَّيْلِ مَا يَهْجَعُونَ))((وَبِالْأَسْحَارِ هُمْ يَسْتَغْفِرُونَ ))(الذاريات: ١٥ـ١٨)، ئانكو: ب راستى پارێزكار يێت د ناڤ جنيك و كانياندا. تشتێ خودايێ وان دايه وان وه‌ردگرن و رازينه، ب راستى ئه‌و به‌رى نوكه [د دنيايێدا] ژ قه‌نجيكاران بوون. ئه‌و پيچه‌ك ژ شه‌ڤێ دنڤستن. و ئه‌و به‌رێ سپێده‌يان [خودێ دپه‌رستن] و داخوازا ژێبرنا گونه‌هان ژ خودێ دكرن.
ديسا خودايێ مه‌زن د ئايه‌ته‌كا ديدا په‌سنا وان دكه‌ت و ژ به‌نده‌يێت خۆ يێت چاك و باش ددانيت، دبێژيت:((وَعِبَادُ الرَّحْمَٰنِ الَّذِينَ يَمْشُونَ عَلَى الْأَرْضِ هَوْنًا وَإِذَا خَاطَبَهُمُ الْجَاهِلُونَ قَالُوا سَلَامًا))((وَالَّذِينَ يَبِيتُونَ لِرَبِّهِمْ سُجَّدًا وَقِيَامًا)) (الفرقان: ٦٣ـ٦٤)، ئانكو: و به‌نده‌يێت خودايێ دلۆڤان [يێت دورست] ئه‌ون، ئه‌وێت ب ئه‌ده‌ب و بێ مه‌زنايى، ل سه‌ر عه‌ردى ب رێڤه دچن، و ئه‌گه‌ر نه‌زانان [ب ره‌قى] ئاخافتن، ئاخفتنه‌كا وه‌سا دبێژن ژ گونه‌هێ ب سلامه‌ت بن، و وه‌كى وان ب ره‌قى وان نائاخێڤن.
و ئه‌وێت بۆ خودايێ خۆ، شه‌ڤان ب سوجده و رابوونانڤه دبۆرينن [ئانكو: شه‌ڤنڤێژان دكه‌ن]. و د ئايه‌ته‌كا ديدا خودايێ مه‌زن شاده‌يێ ل سه‌ر ئيمان و باوه‌ريا وان دده‌ت و دبێژيت: ((إِنَّمَا يُؤْمِنُ بِآيَاتِنَا الَّذِينَ إِذَا ذُكِّرُوا بِهَا خَرُّوا سُجَّدًا وَسَبَّحُوا بِحَمْدِ رَبِّهِمْ وَهُمْ لَا يَسْتَكْبِرُونَ )) ((تَتَجَافَىٰ جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفًا وَطَمَعًا وَمِمَّا رَزَقْنَاهُمْ يُنفِقُونَ )) (السجده: ١٥ـ١7)، ئانكو: ب راستى، ئه‌و باوه‌ريێ ب ئايه‌تێت مه دئينن و بۆ خۆ مفايى ژێ وه‌ردگرن، ئه‌وێت ئه‌گه‌ر پێ دئێنه شيره‌تكرن دكه‌ڤن، و ب گريڤه دچنه سوجده‌يێ، و خودێ ژ هه‌مى كێماسيان پاك و پاقژ دكه‌ن و حه‌مد و شوكرا وى دكه‌ن، و خۆ [ل سه‌ر په‌رستنا وى] مه‌زن ناكه‌ن. قه‌وى ته‌نشتێت وان ناكه‌ڤنه سه‌ر نڤينان [ئانكو: كێم دنڤن، و رادبن شه‌ڤنڤێژان دكه‌ن]، و ب ترس و هيڤيڤه دوعايان ژ خودێ دكه‌ن، و رزقێ مه داييه وان خێر و سه‌ده‌قه‌يان ژێ دده‌ن. كه‌س نوزانيت چ خه‌لات يێ بۆ وان هاتيه ڤه‌شارتن، چاڤێت وان پێ رۆن ببن و ب ديتنا وى شاد ببن، ژبه‌ر وان كار و كريارێت وان دكرن.
ديسا گه‌له‌ك حه‌ديس ژى، قه‌در و بهايێ شه‌ڤنڤێژان و خودانێ وان ديار دكه‌ن، ژ وان پێغه‌مبه‌ر (سلاڤێت خودێ لێ بن) دبێژيت: ((هشيارى نڤێژا شه‌ڤێ بن، ب راستى ئه‌و ره‌وشتێ مرۆڤێت باش بوون يێت به‌رى هه‌وه، ئه‌و دێ هه‌وه نێزيكى خودێ كه‌ت و گونه‌هێت هه‌وه ژێ به‌ت و هه‌وه ژ گونه‌هێ ده‌ته پاش و نه‌خۆشيان ژ هه‌وه ده‌ته پاش و دويرئێخيت)).
ديسا دبێژيت: ((باشترين رۆژى پشتى هه‌يڤا ره‌مه‌زانێ هه‌يڤا خودێيه يا موحه‌ره‌مێ، و باشترين نڤێژ پشتى يا فه‌رز يا شه‌ڤێيه)). ديسا دبێژيت: ((گه‌لى خه‌لكى.. سلاڤێ به‌لاڤ بكه‌ن، و زادى و خوارنێ بده‌ن، و باشيێ دگه‌ل مرۆڤێت خۆ بكه‌ن، و شه‌ڤنڤێژان بكه‌ن و خه‌لكێ نڤستى، ب سلامه‌تى دێ چنه به‌حه‌شتێ)). و ب راستى گه‌له‌ك حه‌ديسێت دى ژى يێت هه‌ين، و وه‌ختێ وێ پشتى نڤێژا عه‌يشا ده‌ست پێ دكه‌ت و به‌رده‌واميێ دده‌ته خۆ هه‌تا بانگێ سپێدێ، به‌لێ قه‌درترين و خێرترين وه‌ختێ وێ سێكا شه‌ڤێيه يا دويماهيكێ.
عائيشا دايكا مه موسلمانان دبێژيت: پێغه‌مبه‌رێ خودێ (سلاڤێت خودێ لێ بن) سه‌رێ شه‌ڤێ دنڤست و دويماهيكا وێ رادبوو نڤێژ دكرن. نڤێژێت وێ دوو ركاعه‌ت دوو ركاعه‌تن، و هندى بشێت به‌لێ دڤێت مرۆڤ هندا بكه‌ت هندى بشێت. پێغه‌مبه‌ر (سلاڤێت خودێ لێ بن) دبێژيت: ((صَلاه اللَّيْلِ مَثنَى مَپنَى، فَإِذا خِفْتَ الصُّبْح فَأَوْتِرْ بِواحِدَه)) ئانكو: نڤێژا شه‌ڤێ دوو دووه‌نه، و هه‌كه تو ژ سپێدێ ترسياى ويتره‌كێ بكه)). ديسا پێغه‌مبه‌ر (سلاڤێت خودێ لێ بن) دبێژيت: ((عليكم بصلاه الليل ولو ركعه)) ئانكو: هشيارى نڤێژا شه‌ڤێ بن خۆ هه‌كه ركاعه‌ته‌ك ب تنێ ژى بيت. ته‌به‌رانى د كه‌بير و ئه‌وسه‌تێدا ڤه‌گێرايه، ڤێجا يا فه‌ر ئه‌وه مرۆڤ بكه‌ت چه‌ند ركاعه‌ت بن دورسته، به‌لێ يا ژ هه‌ميان باشتر مرۆڤ به‌رده‌واميێ ل سه‌ر يازده ركاعه‌تان بكه‌ت؛ ژبه‌ر كو دايكا مه عائيشا خودێ ژێ رازى بيت) دبێژيت: پێغه‌مبه‌رێ خودێ (سلاڤێت خودێ لێ بن) نه ل ره‌مه‌زانێ و نه ل غه‌يرى ره‌مه‌زانێ ژ يازده ركاعه‌تان زێده نه‌دكرن، چار دكرن و پسيارا باشيا وان و درێژيا وان نه‌كه (هندى هند د باش و درێژ بوون)، پاشى چار دكرن و پسيارا باشيا وان و درێژيا وان نه‌كه، پاشى سێ دكرن و خودێ چێتر دزانيت.
